من المهم انه تكون عندك علاقات جيدة وقوية حيث هي واحد الحاجة مهمة واساسية باش تكون فرحان في حياتك ، من الممكن انه تكون عندك بزاف العلاقات ولكن خاصك تعرف الفرق بين كل علاقة واخرى ،حيث كاين اشخاص لي كتحس انك قريب منهم بزاف بالمقابل كاين اشخاص لي كيكونو مجرد معارف لا اكثر.
اذا خاصك تعرف ان الصداقة مستوياتها مختلفة وانه يمكن ليك دير حدود للحوايج لي ممكن تشاركهم مع هاد الاشخاص ، حيث المشاعر ديالك الحقيقية مكتشاركهاش مع اي شخص بل فقط مع الشخص لي قريب ليك ولي كتيق فيه وكتحس معاه بالأمان.
الا مكنتيش متاكد كيفاش تفرق بين العلاقات ديالك وتحدد مستوى كل وحدة فيهم فممكن لك تستاعن بتحليل المستويات المختلفة ديال الصداقات لي ربطتيهم في حياتك .
الصورة لتحت كتوضع ثلاثة المستويات ديال الصداقة
فكر في الاشخاص لي كتعرفهم وحط كل واحد في الدائرة لي كضن انه كينتمي ليها
يمكن لك ترسم ثلاث دوائر وتدير فيها أسماء الأشخاص.
الشكل 1 دوائر العلاقات (على سبيل المثال)
هاد الاشخاص هوما لي مقربين ليك بزاف وكيفهموك كتيق فيهم و كتحس معاهم بالامان والاهم انهم كيوقفو معاك في وقت الشدة
العدد ديال هاد الاشخاص غالبا مكيتعداش 5 وممكن يكون اقل هاد شي بحد ذاتو ماشي مشكل بحيث ان الاختيار كيرجع لك حيث نتا لي كتختار شكون ايدخل في هاد الدائرة (ممكن يكون استاذك , فرد من العائلة ,زميل ديلك ……..الخ)
ولكن خاصك تعرف ان عدد هاد الاشخاص مخصوش يكون كبير بزاف حيث كلما تزاد كلما دختي ورتبكتي وعشتي خيبات امل .
تاكد ان هاد الدائرة عامرة بالاشخاص المناسبة حيث ايكون ليهم تاثير قوي على شخصيتك وحياتك والاهم احترامك لذاتك.
دائرتك الوسطى كتحتوي على الاصدقاء المزيايين, و لي هوما عبارة عن اشخاص كيعجبك دوز معاهم الوقت وتشاركهم الاخبار والاهتمامات والخبرات، هاد الاشخاص لي ممكن تشارك معاهم اللحظات زوينة و لخايبة والاشياء لي كتمارسها يوميابحال تغدا معهم او تضحك معهم او تكون معهم فلمركز…
ولكن كيختلفو على الاشخاص ليداخلين في الدائرة الداخلية، بحيث ممكن انك تشارك معاهم افكارك ولكن ماشي احاسيسك .
هاد الاشخاص هوما مصنفين في الدائرة الثانية وكيمكن ليهم يدخلو ويخرجو منها على حساب اهتمامك والانشطة لي كتمارسها والوقت لي كتدوزو معاهم .
هاد الدائرة كتكون من الناس لي كتربطك بهم علاقة مش عميقة، الناس لي كتشوفهم بشكل منتظم وكتسلم عليهم وضحك معاهم وتعاود ليهم على نهارك والحوايج الجداد في حياتك . ولكن مكينش داك التواصل العميق بحيث مكتشاركهمش اسرارك ومشاكلك ،هاد الاشخاص يقدرو يكونو جيرانك او زملاء ديالك في المدرسة او معرفة من وسائل التواصل الاجتماعي وهادو كيدخلو ويخرجو من حياتك .
من الممكن ان المجهود لي كتديرو في هاد العلاقات ممكن يضرك حيث يقدر يكونو ناس مزيانين ولكن ماشي كاملين محل ثقة وبالتالي ماخاصكش ثيق وتشاركهم الاشياء المهمة في حياتك.
-اشنو هوما جوج الحوايج لي نتا باغي تهدر فيهم مع دائرتك الداخلية فقط ؟ وعلاش؟
-واش سبق ليك نذمتي انك شاركتي افكارك الداخلية مع الاشخاص لي هوما مصنفين في الدائرة الوسطى او الخارجية ؟ اشنو هي المشاكل لي نتجات على التصرف ديالك ؟
-كاين شي واحد مكتعرفوش مزيان شارك معاك معلومات خاصة به ؟ اشنو كان الشعور ديالك تجاه هاد الشخص؟
-واش جنس الشخص او سن ديالو مهم باش تختار الدائرة لي تصنفو فيها؟
-اشنو هي المميزات لي ممكن على اساسها تحدد اشخاص في دائرتك الداخلية ؟ واش هو شخص ثقة ؟ شخص كيسمع ليك ؟ شخص كيدعمك ؟ واش ممكن تفكر فاسباب اخرى تحطها في هاد الدائرة؟
-واش كين شخص في دائرتك الخارجة بغيتي تقرب منو اكثر ؟ اشنو ممكن دير باش تعرف عليه اكثر؟
Input your search keywords and press Enter.